Күгәрсен районының «Мораҙым» тарлауығы тиҙҙән «Байыҡ» республика балалар телевизион бейеү конкурсы ҡатнашыусыларын ҡабул итә. Фестиваль 25 июлгә билдәләнгән. Ошо көндәрҙә Өфөлә күләмле проектҡа һайлап алыу туры үтте.

Конкурстың географияһы йылдан-йыл киңәйә. Быйылғы һайлап алыу турҙары Өфө, Баймаҡ ҡалаларында ғына үтеүгә ҡарамаҫтан, республика район-ҡалаларынан тыш, күрше өлкәләрҙән дә йәш таланттар күпләп ҡатнашты. 

Йәш быуын халҡының тарихын, мәҙәниәтен, шәхестәрен белеп үҫергә, уны сәхнәләрҙә танытырға ынтыла. Был бигерәк тә «Байыҡ»та асыҡ сағыла. Балалар өсөн махсус тегелгән милли кейемдәр, көмөштән һуғылған сулпылар күҙҙең яуын алырлыҡ.

«Байыҡ» бейеү бәйгеһе йыл һайын яңы исемдәр асыуы, малай-ҡыҙҙарҙың күпләп ҡатнашыуы менән мәртәбәле. Ул хәҙер үҙе бер балалар бейеү сәнғәтең яңы бейеклеккә күтәргән йәш һәләттәр мәктәбен хәтерләтә. Шуға ла матурлыҡ, батырлыҡ, актерлыҡ оҫталығы менән һуғарылған бейеү байрамын олоһо ла, кесеһе лә көтөп ала.