Башҡорт бейеүе – дәүерҙәр һынауын үткән, халҡыбыҙҙың быуындарҙан килгән аҫыл хазинаһына тамырҙары менән береккән сәнғәт ынйыһы. «Байыҡ» республика телевизион конкурсы ошо хазинаны бар сағыулығында балҡытыусы ижад майҙаны булһа, сараның гала-концерты күңелдәрҙе ҡояш нурына мансыған, күҙҙәрҙә йән иретер нур уйнатҡан башҡорт бейеүен һөйөүселәрҙең уртаҡ байрамы ул.
«Байыҡ» - Башҡортостан юлдаш телевидениеһының иң уңышлы проекттарының береһе. Конкурстың маҡсаты - башҡорт бейеүҙәренең халыҡсанлығын һаҡлау, уны башҡа тарафтарға танытыу. «Башҡортостан» телерадиокомпанияһының Республика халыҡ ижады үҙәге менән берлектәге проекттың хәҙер инде биш йыллыҡ тарихы бар.
Конкурстың етәксеһе һәм авторы Рита Өмөтбаева йыл буйы дауам иткән конкурс тураһында фекерҙәре менән уртаҡлашып, бәйгенең, йылдағыса, ҡыҙыу барыуын билдәләне. Быйыл унда биш йөҙҙән ашыу конкурсант ҡатнашҡан. Бейеү байрамында уларҙың «иң-иң»дәре сығыш яһаясаҡ. Халҡыбыҙҙа бейеүгә оҫталыҡ ҡаныбыҙға һеңгән шул. Конкурста йәш-елкенсәктән алып сал сәсле инәй-олатайҙарға тиклем ҡатнашыуы шул турала һөйләй. Телевизион конкурста бейеүгә таһыл, маһир башҡарыусылар милли ерлектән айырылмаған бейеүҙәребеҙҙе тәү матурлығында һаҡлап, тамашасы иғтибарына еткерҙе.
15 декабрҙә баш ҡаланың «Нефтсе» мәҙәниәт һарайына йыйылыусылар республикабыҙҙа ғына түгел, халыҡ-ара кимәлдә киң танылыу алған бишенсе «Байыҡ» республика телевизион конкурсының еңеүселәрен алҡышлаясаҡ. «Башҡортостандың мәҙәни донъяһы» порталы