Башҡорт бейеүҙәренең халыҡсанлығын һаҡлау, уны башҡа тарафтарға танытыу маҡсатында ойошторолған башҡорт бейеүен башҡарыусыларҙың «Байыҡ» телевизион конкурсы алтынсы миҙгелен асты.

Быйыл бәйгелә 800-ҙән ашыу бейеүсе ҡатнашырға теләк белдерҙе. Жюри тарафынан һайлап алынған 500 конкурсант 1-се турҙа үҙ көсөн һынаясаҡ. 

«Башҡортостан» дәүләт телерадиокомпанияһы Республика халыҡ ижады үҙәге менән берлектә 2008 йылдан алып «Байыҡ» бейеү телевизион конкурсын ойоштора. Бәйгенең маҡсаты - башҡорт бейеүен халыҡсан башҡарыу традицияларын тергеҙеү, һаҡлап алып ҡалыу һәм үҫтереү. Биш йыл рәттән барған конкурс республиканың ғына түгел, башҡа төбәктәр халҡын да берләштергән бәйге майҙаны булып тора. 

Баймаҡ, Учалы, Өфө ҡалаларында һәм Салауат районында үткән һайлап алыу турында 800-ҙән ашыу бейеүсе үҙ көсөн һынаны. Бәйге шарттары буйынса һайлап алынған 500 бейеүсе 1-се турҙа ҡатнашасаҡ. Конкурс барышын һәр аҙна Башҡортостан юлдаш телевидениеһынан күҙәтеп барырға мөмкин.

Сығанаҡ: Башҡортостан юлдаш телевидениеһы сайтынан