2 июндә М.Ғафури исемендәге Башҡорт дәүләт академия драма театры һәм Башҡортостан Республикаһының Дәүләт Йыйылышы - Ҡоролтайҙың мәҙәниәт, спорт, йәштәр эштәре буйынса Комитеты 1 июндә бөтә донъяла билдәләнгән Халыҡ-ара балаларҙы яҡлау көнө айҡанлы Өфөнөң Реабилитацион үҙәгенә ҡараған мөмкинлектәре сикләнгән балалар өсөн “Йондоҙҙар һәм балалар” исемле мәрхәмәтлек кисәһе уҙғара.

Был ҙур ижади кисәлә клоундар, төрлө әкиәт геройҙары балаларҙың күңелен асып, улар менән фотоға төшәсәк; театр артистары балалар менән бергә йырлай, бейей, шулай уҡ төрлө уйын һәм конкурстар ҡаралған. Был оло байрам уңайынан билдәле йырсылар: Нурия Ирсаева, Йәмил Әбделмәнов, Роберт Юлдашев, Нәзифә Ҡадырова, Светлана Хәкимова, Зөлфиә Ҡудашева, Әлфиә Юлсурина, Алһыу Бәхтиева, Гүзәл Мамина, Лилиә Ишемйәрова, Артур Ҡунаҡбаев, Фәиз Шәрипов, Руслан Сәйфетдинов, Фирғәт Ғарипов, Урал Әминев, Миңлеғафур Зәйнетдинов һәм башҡалар ҡатнашлығында бай йөкмәткеле концерт та әҙерләнә.

Сығанаҡ: «Шоңҡар» журналы