26 ноябрҙә Әхмәтзәки Вәлиди исемендәге Милли китапханала танылған балалар яҙыусыһы Фәрзәнә Ғөбәйҙуллинаның юбилей кисәһе ойошторола. Сара башҡорт әҙәбиәте һәм тыуған яҡты өйрәнеү бүлегендә көндөҙгө сәғәт 3-тә башлана.

Фәрзәнә Хәйбулла ҡыҙы Ғөбәйҙуллина Ейәнсура районының Мәзит ауылында тыуған. Урта мәктәпте Өфө ҡалаһындағы 1-се интернат-мәктәптә тамамлай. Стәрлетамаҡ педагогия институтынан һуң оҙаҡ йылдар уҡытыусы булып эшләй. Бала сағынан әкиәттәр, хикәйәләр, шиғыр¬ҙар, сценарийҙар ижад итә, баш¬ҡорт балалар яҙыусыларының әҫәрҙәрен – урыҫ теленә, урыҫ телле яҙыусыларҙың әҫәр-ҙәрен башҡортсаға тәржемә итә, бик күп мәҡәләләр яҙа. Фәрзәнә Ғөбәйҙуллинаның һүҙҙәренә балалар өсөн йырҙар яҙылған. Әлеге ваҡытта Фәрзәнә Хәйбулла ҡыҙы – ун бишләгән китап авторы. Авторҙың «Ашҡаҙар» радиоһында әҙәбиәт темаһына алып барған тапшырыуҙар циклы тыңлаусыларҙа популярлыҡ менән файҙалана.
Күркәм байрамын өр-яңы китабы менән ҡаршылай әҙибә. Фәрзәнә Хәйбулла ҡыҙының оҙаҡ йылдар дауамындағы тырыш хеҙмәте "Рәсәй Федерацияһының мәғариф отличнигы", "Башҡортос¬тандың атҡаҙанған мәҙәниәт хеҙмәткәре", Баязит Бикбай исемендәге әҙәби премия лауреаты тигән маҡтаулы исемдәр менән баһаланған.