21 май, Мәжит Ғафури исемендәге Башҡорт дәүләт академия драма театрында журналистар ҡатнашлығында матбуғат конферецияһы уҙҙы. Унда театрҙың художество етәксеһе Олег Ханов, премьера спектакленең авторы Әлфис Ғаязов, артистар Гөлли Мөбәрәкова, Алмас Әмиров һәм Юлиә Ғәләүетдинова ҡатнашты.

Йылдағыса театр ижад миҙгелен премьера менән яба. Тамашасы хөкөмөнә Әлфис Ғаязов пьесаһы буйынса «Яңғыҙҙар ташы» спектаклен тәҡдим итәсәктәр. Автор әҫәр ике йыл ярым элек яҙылды, тине. Унда йәштәрҙә тыуған илгә һөйөү тәрбиәләү, кешелеклелек, изгелек кеүек актуаль темалар күтәрелә.

Театрҙың художество етәксеһе 94-се ижад миҙгеленә йомғаҡ яһаны:

- Был ижад миҙгеле ваҡиғаларға һәм спектаклдәргә бай булды. Йыл буйына беҙ киләһе 95-се юбилей ижадына әҙерләндек. Быйылғы йылда тамашасыға иғтибарына 5 премьера спектакле тәҡдим ителде: «Ғәфү ит мине», «Йәнем, иртәгә яңы көн тыуыр», «Маҡтымһылыу, Әбләй һәм Ҡара Юрға», «Мин ҡатын-ҡыҙ» һәм «Яңғыҙҙар ташы». Көҙ театр гастролдәр менән Ырымбур һәм Мәскәүгә юлланасаҡ. 

95-се ижад миҙгелендә исеменән үк тәнде земберлеткән премьералар көтөлә – Мәжит Ғафуриҙың «Ҡара йөҙҙәр»е һәм Баязит Бикбайҙың «Ҡаһым түрә»һе. Дөйөмләштереп әйткәндә, киләһе йылда ла яратҡан театрыбыҙ беҙҙе сағыу тамашалары менән ҡыуандырасаҡ.