Ошо көндәрҙә Хөсәйен Әхмәтов исмендәге Башҡорт дәүләт филармонияһында 76-сы ижад миҙгелен ябыуға арналған тантаналы концерт уҙҙы. 

Тамашасыны филармония ишектәрен асылыу менән байрам кәйефе солғап алды. Фойе нәзәкәтле арфа моңона күмелгәйне. Теләгән һәр кем башҡорт милли эсемлектәре: ҡымыҙ, буҙанан ауыҙ итте, шампан каскадынан семерҙәп торған эсемлекте тәмләне. Шоколад фонтаны ла тамашасы күңеленә хуш килде.

Концерт башланырға һынаулы ғына минуттар ҡалыуға ишаралаған ҡыңғырау яңғырау менән барыһыла залға ашыҡты. Миҙгел “Йондоҙло сәйәхәт” тип аталан программа менән ябылды. Күңелдең иң нескә ҡылдарын тибрәлтер башҡорт, татар, рус халыҡ йырҙары, башҡорт композиторҙары әҫәрҙәре яңғыраны был кистә. Башҡорт эстрадаһының моңло һандуғастары Нәзифә Ҡадырова, Ғәли Алтынбаев, Хәлит Фатыхов, Миңзифа Исҡужина, Азамат Тимеров, Радик Вәлмөхәмәтов, Лилиә Ишемйәрова, Фәдис Ғәниев, Марсель Ҡотоев, Руслан Сәйфетдинов, йәш, өмөтлө йырсылар Зилиә Бәхтиева, Айгиз Ханов, Айтуған Ғайзуллин, Екатерина Ямщикова, Валентина Суходоева, “Далан”, “Каруан”, “Әссәләм” фольклор-эстрада төркөмдәре зауыҡлы һәм сағыу уттар менән биҙәлгән йыр-моң майҙанын гөрләтте. 

Антракт ваҡытында абонементтар аукционы ла йәнле үтте. Әйткәндәй, филармонияла 77-се ижад миҙгеле концерттарына абонементтар һатыу башланды. 

Филармонияның сираттағы 76-сы ижад миҙгеле лә артта ҡалды. Киләһе 77-се ижад миҙгелендә көтөп ҡалабыҙ, һеҙҙе дуҫтар!