11 июнь данлыҡлы Башҡорт дәүләт опера һәм балет театры үҙенең 75-се ижад миҙгелен яба. Шулай уҡ тарихи бина бер йылға реконструкцияға ябыла. Театрҙың художество етәксеһе Рөстәм Сабитов әйтеүенсә, ремонт эштәре ШОС һәм БРИКС Халыҡ-ара саммиттарға бәйле. Театрға тышҡы һәм эске яҡтан капиталь ремонт эшләнәсәк, быға бюджеттан аҡса бүленгән. Архитектура ҡомартҡыһының тышҡы яҡ кирбестәре махсус таҙартыласаҡ, фойены байытыу маҡсатында декоратив элементтар ҡулланыласаҡ, тамашасы залының ултырғыстарын алмаштырасаҡтар. Бөтә был эштәр бер йылға иҫәпләнгән. Шуға ла коллективҡа бер ни тиклем ауырлыҡтар күрергә тура киләсәк. Артистарға репетициялар уҙғарыу мөмкинлеге ҡала, ә спектаклдәр ҡаланың ҡуртымға алынған мәҙәниәт һарайында үтәсәк.