Театрҙың матбуғат хеҙмәте хәбәр итүенсә, Башҡорт дәүләт опера һәм балет театрында яңы етәкселек тәғәйенләнде. Рәсәйҙең атҡаҙанған сәнғәт эшмәкәре, Башҡортостандың халыҡ артисы Валерий Платонов театрҙың художество етәксеһе итеп тәғәйенләнде. 1991-2001 йылдарҙа ул ошо уҡ ойошмала баш дирижер булып хеҙмәт итә. Уның етәкселегендә халыҡ-ара «Шаляпин кистәре», Рудольф Нуриев исемендәге балет фестивалдәре үтә. Валерий Платонов бик күп илдәрҙә сығыш яһай.

Артем Макаров йәнә баш дирижер булып тәғәйенләнде. Ул З.Исмәғилев исемендәге Өфө дәүләт сәнғәт академияһында белем ала («фортепиано» бүлеге). 2003 йылда ошо уҡ уҡыу йортоноң аспирантураһын тамамлай. Студент сағынан уҡ (1997 й.)опера һәм балет театрында концертмейстер булып хеҙмәт юлын башлай. 2003-2010 й.й. бер юлы Башҡорт дәүләт опера һәм балет театрында һәм Анкара дәүләт операһында (Төркиә) эшләй. 2011-13 й.й. опера театрының баш дирижеры, 2014 й. Анталия операһында (Төркиә) музыкаль етәксе.