Профессиональ йырсылар көс һынашҡан бәйге ике йыл эсендә халыҡ, эстрада йырҙарын башҡарыусылар араһында өр-яңы исемдәр асты. Башҡортостан Президенты ярҙамында ойошторолған быйылғы конкурста 50-гә яҡын йырсы ҡатнашты. Кемдәр еңеүсе тип табылыр?

Халыҡ йырын юғары башҡарыу оҫталығы, композитор әҫәрҙәренең һәр нотаһын еренә еткереп йырлау - конкурстың төп талабы.

Башҡорт халыҡ йырҙары - ул ҡабатланмаҫ рухи ынйы, милләт ғорурлығы. Тамырҙары быуаттар төпкөлөнә барып тоташҡан илаһи моңға бөйөк тарих, ата-бабалар рухы һеңгән. Изге аманатҡа тоғролоҡ һаҡлап, Башҡортостан юлдаш телевидениеһы ойошторған «Башҡорт йыры» фестиваленең төп маҡсаты ошо. Профессиональ йырсыларҙы бергә йыйған ижад майҙаны йыл дауамында 50-гә яҡын ҡатнашыусыны ҡабул иткән. Ниһайәт, ике турҙа ла һынатмаған оҫталар финалға үтте.

Гала-концерт 24 декабрҙә Башҡорт дәүләт опера һәм балет театрында үтәсәк. Финалистар төрлө номинациялар буйынса, ә башҡорт халыҡ йырының бар нескәлеген тотош күңеле аша үткәреп, тамашасыға еткергән йырсы махсус статуэтка менән бүләкләнәсәк.