Илебеҙҙең баш ҡалаһында Милли фильмдар фестивале үтте. Башҡортостан «Елғыуар» кинокартинаһы менән сығыш яһаны.

«Улан-батор» кинотеатрын Мәскәүҙә йәшәүсе яҡташтарыбыҙ тиҙ арала республиканың күркәм мөйөшөнә әйләндерҙе. Фойела аш-һыу, кейем өлгөләре ҡуйылған. Экранда - башҡорт киноһы. «Москино» компанияһы милли кинематограф менән таныштырыу тәҡдиме яһағас, тәүгеләрҙән булып Башҡортостан вәкилдәре яуап биргән.

«Елғыуар» Мәскәү экрандарында икенсе тапҡыр күрһәтелә. Тамашасы ла уны яратып өлгөргән. Әммә әлегә төбәктәрҙә төшөрөлгән фильмдарҙы күләмле прокатҡа сығарыу өсөн шарттар юҡ.

Рәсәй кимәлендә танылыу яуламаһа ла, Башҡортостанда «Елғыуар» яҡшы таныш, тип билдәләй фильмдың режиссеры Айсыуаҡ Йомағолов. Тамашасылар араһында, әлбиттә, яҡташтарыбыҙ күп. Экран аша улар тыуған ерҙәренә ҡайтып килгәндәй була. Әммә залда яҡшы фильмға тамаша ҡылырға теләүселәр ҙә байтаҡ булды.

Мәскәүҙә Милли кино фестивале артабан да дауам итәсәк. Ойоштороусылар Рәсәйҙең төрлө төбәктәрендә төшөрөлгән фильмдарҙы баш ҡала тамашасыһына тәҡдим итергә ниәтләй.