Рәсәй Фәндәр академияһының Өфө ғилми үҙәге Тарих, тел һәм әҙәбиәт институты сығарған «Башҡорт теленең академик һүҙлеге»нең 2 томының исем туйы үтте. Хеҙмәт ун томлыҡ буласаҡ.

Китаптарҙың исем туйында ҡатнашҡан вәкилдәр — Башҡортостан Президенты Хакимиәтенән Ришат Сабитов, Хөкүмәттән Рәйлә Вахитова, «Китап» нәшриәте директоры Зөфәр Тимербулатов, «Өфөполиграфкомбинат» предприятиеһы директоры Шамил Бикҡолов академик һүҙлектең республика өсөн ҙур бүләк булыуын, артабанғы томдарҙы сығарыуҙа ла берҙәм эшләү мөһимлеген билдәләне.

Академик һүҙлектең файҙаһы ифрат ҙур буласаҡ. Унда һәр һүҙҙең аңлатмаһы башҡорт һәм урыҫ телдәрендә бирелгән. Баш һүҙ — башҡорт, урыҫ, инглиз, төрөк телдәрендә. Был хеҙмәтте икенсе төрлө «Башҡорт теленең аңлатмалы-тәржемәүи һүҙлеге» тип иҫәпләргә лә мөмкин. 

Һүҙҙәрҙең аңлатмаһы ла, тәржемәһе лә булған академик һүҙлек журналистар, уҡытыусылар, нәшриәт хеҙмәткәрҙәре, туған телен белмәгән, уны өйрәнеү теләге менән янған милләттәштәребеҙ өсөн дә ифрат кәрәкле ҡулланма буласаҡ. 

«Башҡортостандың мәҙәни донъяһы» порталы