12-се февралдә, Өфө сәнғәт училищеһының концерт залында, Башҡортостандың милли симфоник оркестры үҙенең сираттағы концерт программаһы менән сығыш яһаясаҡ. Концертта Йозеф Гайдндың, Й. Брамс әҫәрҙәренә вариациялар яңғыраясаҡ, һәм дә композитор Ф. Мендельсон-Бартольдиның оркестр менән скрипка өсөн концерты башҡарыласаҡ. Солист - халыҡ-ара конкурстар лауреаты Илшат Мөслимов. Шулай уҡ музыка яратыусылар П.И. Чайковскийҙың 4-се симфонияһын да тыңлай алаясаҡ. Пульт артында дирижер Алексей Коряковцев. Был концерт киске етелә башланасаҡ.
Ә инде 21–се февралдә, киске етелә, шул уҡ залда, ир-аттарға, ил һаҡсылары ихтирамына арналған тағы ла бер концерт үтәсәк. Был концерт программаһында хәрби-патриотик темаларға арналған композитор Петр Чайковскийҙың «Торжественная увертюра 1812 года», «Торжественный коронационный марш»; Дмитрий Шостаковичтың «Праздничная увертюра», Халик Заимовтың «Героическая увертюра», А. Сальманованың «Посвящение», Николай Иванов-Радкевичтың «Капитан Гастелло» әҫәрҙәре һәм Бөйөк Ватан һуғышына арналған фантазиялар яңғыраясаҡ. Дирижер – Башҡортостан Республикаһының халыҡ артисы Фәрит Иҙрисов.
28–се февралдә, милли симфоник оркестрының «Башкирия» камерный составы сығыш яһаясаҡ. Программала А. Шнитке, П. Хиндемит, А. Пярт, П. Булезаның әҫәрҙәре. Дирижёр – милли симфоник оркестрының художество етәксеһе Рөстәм Сөләймәнов. Концерт шулай уҡ киске етелә башлана. «Башҡортостандың мәҙәни донъяһы» порталы