Башҡортостан сәнғәтә ошо көндәрҙә оло юғалтыу кисерҙе. 85-се йәшендә БАССР-ҙың сәнғәт эшмәкәре, РФ һәм БР Рәссамдар союзы ағзаһы Эвелина Фенина мәрхүмә булып ҡалды.
Эвелина Павловна 1929 йылдың 10 ноябрендә Троицк ҡалаһында тыуған. 1953 йылда А.Жданов исемендәге Ленинград дәүләт университеты тарих факультетының тарих һәм сәнғәт теорияһы бүлеген тамамлай.
Эвелина Фенина 26 йыл буйына М.В. Нестеров исемендәге һынлы сәнғәт музейында хеҙмәт итә. Шулай уҡ БДПУ-ның художестволы графика факультеты доценты булып эшләй.
Эвелина Павловна бик күп башҡорт рәссамдарына фәнни эштәрен бағышлай. Мәҫәлән, ул Рауил Ғүмәров, Владимир Пустарнаков, Әмир Арсланов, Ғабдулла Мостафин, Алексей Храмов, Рәхим Ишбулатов, Григорий Круглов, Константин Головченколарҙың ижадына тулы байҡау яһай. Ул бик күп ғилми-ғәмәли конференцияларҙа ҡатнаша, бик күп мәҡәләләр авторы.