Быйыл «Башҡортостан» киностудияһы ойошторолоуға 25 йыл. Ошо дата һәм Өфөлә үтәсәк ШОС һәм БРИКС саммиты айҡанлы, Башҡортостан юлдаш телевидениеһында киностудияла төрлө йылдарҙа төшөрөлгән төрлө жанрҙағы фильмдар күрһәтеләсәк. 30 июндән 12 июлгә тиклем эфирға 7 фильм сығасаҡ.

30 июнь Айнур Асҡаровтың «Еңмеш» ҡыҫҡа метражлы фильмы күрһәтелде. 4 июль 20.00 сәғәттә Әнүәр Райбаевтың «Рәхмәт» комедияһы күрһәтелһә, 5 июль 20.15 сәғәттә Булат Йосоповтың Мостай Кәримдең повесы буйынса төшөрөлгән «Оҙон-оҙаҡ бала саҡ» фильмы эфирға сығасаҡ.

7 июль 23.30 сәғәттә Айнур Асҡаровтың «Әсә» кинокартинаһын ҡарарға була. 10 июль 23.30 сәғәттә Булат Йосоповтың Рудольф Нуриевҡа арналған «Визит» фильмы күрһәтелә. 11 июль тамашасы хөкөмөнә Айсыуаҡ Йомағоловтың «Ел аулаусы» драмаһын тәҡдим ителәсәк. Төп ролдәрҙең береһендә – билдәле актер Марат Башаров. 12 июль 20.15 сәғәттә Булат Йосоповтың «Ауыл өҫтөндә йәйғор» мелодрамаһына тамаша ҡылырға була.

Киностудияның матбуғат хеҙмәтенән хәбәр итеүҙәренсә, 12 июлдән һуң да фильмдар күрһәтеүҙе дауам итәсәктәр. Был хаҡта өҫтәмә рәүештә хәбәр итәсәктәр. Был юлы 22 фильм күрһәтеләсәк тип планлаштырыла.