2013 йылда Башҡортостанда ил кимәлендәге 3 мөһим мәҙәни сара уҙғарыласаҡ. Улар – ТЭФИ төбәк телевизион фестивале финалы, «Евразия тауышы» конкурсының йомғаҡлау өлөшө һәм «Рәсәй һылыуҡайы» матурлыҡ бәйгеһе финалы. Был турала президент Рөстәм Хәмитов Республика йортонда ТЭФИ фестиваленең «Алтын Орфей»ын яулаған телевидение хеҙмәткәрҙәре һәм Рәсәй һылыуҡайы титулына эйә булған Өфө ҡыҙы Элина Кирәева менән осрашыуында белдерҙе.
Мәҫәлән, ТЭФИ-ҙы яулаусылар белдереүенсә, абруйлы фестивалдә ҡатнашыусыларҙың алдағы йылда тап Башҡортостанда йыйылырға теләктәре бар. Абруйлы телевидение белгестәренең Башҡортостанға килеүе республиканың мәртәбәһен дә күтәрәсәк. «Евразия тауышы» конкурсын да ошо маҡсаттан беҙҙә уҙғарыу - отошло буласаҡ. Ә «Рәсәй һылыуҡайы» бәйгеһенең ҡағиҙәһенә ярашлы, сираттағы конкурс быйылғы еңеүсенең тыуған төбәгендә үткәрелә икән.
ТЭФИ төбәк телевизион фестиваленә килгәндә, быйыл Ҡаҙанда үткән финалда Башҡортостан вәкилдәре лайыҡлы сығыш яһаны. Бөтә Рәсәй дәүләт телерадиокомпанияһының Башҡортостан филиалы һәм Башҡортостан телевидениеһының «Тамыр» балалар телеканалы вәкилдәре унда иң юғары урындар яуланы. Сығанаҡ: «Ашҡаҙар»