Бөгөн, 30 майҙа Өфөгә Башҡортостанда Сыуашстан мәҙәниәте көндәрен үткәреү буйынса Сыуаш Республикаһының Мәҙәниәт һәм милли эштәр, сәйәсәт, мәғлүмәт һәм архив эштәре буйынса министрлығынан бер төркөм вәкилдәр килде. 

Ойоштороу комитетын Мәҙәниәт министрлығының беренсе урынбаҫары Вячеслав Александрович Фошин етәкләй. Шулай уҡ был төркөмдә ҡатнашҡан министрлыҡтың дини бәйләнеш, тарихи һәм мәҙәни ҡомартҡыларҙы һаҡлау буйынса бүлек етәксеһе М.Н. Краснов, Сыуашстан дәүләт художество музейы директоры Г.В.Козлов Башҡортостанда Сыуаш Республикаһы мәҙәниәте көндәрен үткәреүҙә әҙерлек эштәре алып барасаҡ. 

Башҡортостанда Сыуашстан мәҙәниәте көндәре 31 майҙан 2 июнгә тиклем дауам итәсәк. Был республиканың яңы тарихындағы мөһим һәм әһәмиәтле ваҡиға. Күрше республиканан 300-гә яҡын мәҙәниәт эшмәкәре һәм йәмәғәт вәкилдәре ҡатнашасаҡ. 

31 майҙа «Нефтсе» мәҙәниәт һарайында Сыуаш көндәре тантанаһын асыу сараһы һәм «Нарспи» милли сыуаш мюзиклы үтәсәк.

Артабан Өфө, Стәрлетамаҡ ҡалалары, Ауырғазы, Бәләбәй, Бишбүләк Ҡырмыҫҡалы райондары мәҙәниәт йорттарында улар спектаклдәр, концерттар, музей, китапханаларҙа күргәҙмәләр һәм презентациялар уҙғарыу ҡаралған.

Башҡортостанда Сыуаш көндәрен Бишбүләк районында үтәсәк Акатуй Сыуаш милли байрамы йомғаҡлай.