Рәсәйҙең атҡаҙанған, Башҡортостандың халыҡ артисы, Ғ. Сәләм исемендәге Дәүләт премияһы лауреаты, опера йырсыһы Кучуков Раил Фазыл улына 60 йәш.

Раил Фазыл улы Силәбе өлкәһенең Арғаяш районы Ҡолой ауылында 1952 йылдың 28 мартында тыуған. 1978 йылда Өфө дәүләт сәнғәт институтын (хәҙерге З. Исмәғилев исемендәге Өфө дәүләт сәнғәт акдемияһы) тамамлай. Юғары уҡыу йортон тамамлағандан алып бөгөнгө көнгә тиклем ул Башҡорт дәүләт опера һәм балет театры солисты. Беренсе эше — «Салауат Юлаев» операһында Пугачев ролен бик уңышлы йырлай. Беренсе классик партияһы «Фауст»а Валентин роле була. Опера театры үҙе бер мөғжизәле донъя кеүек. Үҙ ҡағиҙәләре, үҙ талаптары бар уның. Бик көслөләр генә сыҙай операла. Бар булмышын опера театры менән бәйләгән Раил Кучуков Риголетто, Амонасро, Жермон, Алеко, Кенәз Игорь кеүек ялҡынлы, ҙур масштаблы ролдәрҙә уйнай. Бөгөнгө көндә ул 90- дан артыҡ партия башҡара.

«Башҡортостандың мәҙәни донъяһы» порталы