Кино һөйөүселәргә «Йәш спецназсы» документаль фильмы тәҡдим ителде. Картинала төп рольдәрҙе хәрби-патриотик түңәрәк һәм «Йәш спецназсы» лагере тәрбиәнеүселәре башҡара.

Сибай ҡалаһынан килгән хәрби-патриотик түңәрәк тәрбиәләнеүсеһе Рита Игушина ҡорал менән бер ауырлыҡһыҙ эш итә. Сөнки ул былтыр йәй «Йәш спецназсы» лагерында хәрби әҙерлек үткән. Бында йәштәр күңелендә илһөйәрлек, ҡыйыулыҡ тойғолары тәрбиәләнә.

2006-2011 йылдарҙа республиканың 53 районында ,,Йәш спецназ,, лагеры ойошторолған. Ошо ваҡыт эсендә өс меңгә яҡын үҫмер хәрби тәртипкә өйрәнә. Йәштәр ысын әрме шарттарында йәшәп үҙҙәрен һынап ҡарай. Документаль фильмда тәрбиәләнеүселәрҙең лагерҙағы тормошо һүрәтләнгән, ти сценарий авторы.

Фильм Наркотиктар әйләнешен күҙәтеү буйынса федераль хеҙмәттең Башҡортостан идаралығы, Мәғариф, Йәштәр һәм спорт сәйәсәте министрлыҡтары менән берлектә төшөрөлә. Фильмдың төп маҡсаты тормош юлында аҙашҡан йәштәрҙе тура юлға баҫтырыу, уларға дөрөҫ тәрбиә һәм йүнәлеш биреү.

Быйыл «Йәш спецназсы» лагерҙары төрлө райондарҙа ойоштороласаҡ тип билдәләй белгестәр. Тимәк, хәрби хеҙмәткә һөйөү тағы ла артасаҡ.

Сығанаҡ: Башҡортостан юлдаш телевидениеһы