Шәмбе, 14 августа, Менделеев урамы, 195 адресы буйынса урынлашҡан Өфө ҡурсаулығында активистар төркөмө өмә үткәрә. Сара барышында хайуандар йәшәгән вольерҙарҙы буяу һәм территорияны төҙөкләндереү планлаштырыла.

— Территория ҡаралмаған, — тине акцияны ойоштороусы Гүзәл Сәғәҙиева. – Ял итеүселәрҙән ҡалған сүп-сар күп, ағастар ауҙарылған. Ҡурсаулыҡҡа бүленгән аҡса уны йыйыштырыуға етмәй. Шуға күрә өфөлөләрҙең берҙәм тырышлығы менән парк матур ял итеү урынына әйләнер, тип ышанабыҙ.

Ойоштороусылар һүҙҙәренсә, акция менән улар йәмәғәтселек иғтибарын ҡалалағы йәнлектәр йәшәгән урындарҙың проблемаларына йәлеп итмәксе. Шулай уҡ территорияны төҙөкләндереү буйынса проект әҙерләү планлаштырыла. Акция тураһында тулыраҡ мәғлүмәт «Бәйләнештә» социаль селтәренең рәсми битендә урынлаштырылған.

Сара 19 сәғәттә башлана.