Кисә, 6 сентябрҙә Салауат Юлаев майҙанында V Халыҡ-ара төрки телле театрҙарҙың «Туғанлыҡ» фестивале асылды. Был байрамға баш ҡалабыҙ бик ентекле әҙерләнгән. Тирә-яҡты моңға күмеп дәртле көй ағыла. Йыйылған һәр халыҡтың төрлө милли кейеменә ҡарап хайран ҡалырлыҡ. Майҙанда теҙелеп киткән этнографик тирмәләр һәр кешенең иғтибарын йәлеп итә.

Барлыҡ төрки халыҡтарҙы берләштергән әлеге мәҙәни сара биш йыл һайын уҙғарылып килә. Туғандар оҙаҡ күрешмәй торһа, һағыныу хисенең ни тиклем көсәйеүе күптәргә мәғлүм. 

Сараны асыу тантанаһында «ТӨРКСОЙ» Халыҡ-ара ойошмаһының генераль секретары Дюсен Касеинов һәм төрки илдәрҙең мәҙәниәт министрҙары ҡатнашты. Республикабыҙ Хөкүмәте Премьер-министры урынбаҫары Салауат Сәғитов Башҡортостан Президенты Рөстәм Хәмитовтың ҡотлау хатын уҡып ишеттерҙе. «Халыҡ-ара төрки телле театрҙарҙың «Туғанлыҡ» фестивале сәхнә оҫталары һәм театр һөйөүселәре өсөн онотолмаҫ байрам булыр, театр коллективтарының ижади үҫешенә, бер-береһе менән хеҙмәттәшлегенә яңы һулыш бирер, тип ышанам», — тиелә Президентыбыҙ ҡотлауында. 

Фестивалде асып М. Ғафури исемендәге Башҡорт дәүләт академия драма театры Нәжип Асанбаев әҫәре буйынса Айрат Абушахманов сәхнәләштергән «Әхмәтзәки Вәлиди Туған» тарихи драмаһын тәҡдим итте.