Бөтөн донъяға башҡорт балет мәктәбенең данын таратҡан, билдәле башҡорт балет бейеүсеһе Рудольф Нуриев тураһында нәфис фильм төшөрөләсәк.
Балет оҫтаһының бала һәм үҫмер сағы тураһында кино сценарийы әҙерләнгән, 12 сериялыҡ телевизион фильмды төшөрөүҙә Рәсәй һәм Көнбайыш режиссерҙары ҡатнаша. Быйыл Рудольф Нуриевтың тыуыуына 75 йыл тула. Ул 1938 йылдың мартында донъяға килә, бала һәм үҫмер йылдары Өфөлә үтә, ошонда тәүге тапҡыр сәхнәгә аяҡ баҫа. Һуңынан балет сәнғәте серҙәрен Ленинград ҡалаһында үҙләштерә, Советтар Союзының балет труппаһының Францияға гастролдәре ваҡытында илдән ҡаса. Атаҡлы бейеүсе 1993 йылдың ғинуарында 54 йәшендә вафат була, Францияла ерләнә. Әлеге көндә Өфөнөң хореграфия колледжы уның исемен йөрөтә, шулай уҡ Р. Нуриев исемендәге балет фестивалдәре лә Өфөлә, бейеүсенең тыуған ерендә үткәрелеп тора. «Башҡортостандың мәҙәни донъяһы» порталы