Белеүегеҙсә, быйыл республиканың төп башҡорт театры - Мәжит Ғафури исемендәге Башҡорт дәүләт академия драма театры үҙенең 95 йыллыҡ оло юбилейын билдәләй.

19 декабргә – театрҙың юбилей тантанаһына ваҡыт яҡынайғандан-яҡыная, шуға күрә һәр кемдә күңел ашҡыныуы, йөрәк ярһыуы. Әлеге көндә ойоштороу эштәре тамамланып бара.

Театр юбилейы - илаһи һәм күркәм байрам. Сөнки театр был көндө, иң тәүҙә, яратҡан тамашасыһына ихтирам һәм рәхмәт хистәрен еткереп, уға тағы бер онотолғоһоҙ байрам кисе бүләк итергә ынтыла.

Юбилей кисәһендә коллектив театрҙың данлы тарихының иң сағыу биттәрен илебеҙ тормошоноң да иң иҫтәлекле ваҡиғаларына бәйләйәсәк, иң мөһим ваҡиғалары аша үтәсәк. Һәм был һис тә тарих һөйләү, йәки үтә етди һәм рәсми рәүештәге юбилей кисәһе фиғелендә түгел, ә тамашасыға ысын мәғәнәһендә байрам бүләк итеү маҡсатынан «үткәнгә йылмайып бағып» принцибынан эшләнә.

Яратҡан театрыбыҙҙың тыуған көнөн бергә үткәрәйек, дуҫтар!