Башҡортостандың халыҡ артисткаһы, РСФСР-ҙың эстрада артистары дипломанты, СССР халыҡтары фольклор йыры конкурсы лауреаты, халҡыбыҙҙың моңло ҡарлуғасы. Эйе, эйе, былар барыһы ла бер кеше хаҡында. Ул да булһа – Мәғфирә Ильяс ҡыҙы Ғәлиева.

Мәғфирә Ғәлиева 1923 йылдың 24 декабрендә Ейәнсура районының Муйнаҡ ауылында донъяға килә. Бала саҡтан радионан башҡорт йырҙарын тыңлап үҫә ул. Бигерәк тә Әсмә Шайморатова, Диана Нурмөхәмәтовалар башҡарған йырҙарҙы мөккиббән китеп тыңлай бәләкәй ҡыҙ. Әсәһенең дә йырлағанын ярата. Яҡын кешеһенән отоп алған бер нисә йыр Мәғфирә Ғәлиеваның репертуарында бөгөнгәсә лайыҡлы урын алған. 

Мәғфирә Ғәлиева мәшһүр башҡорт композиторы Ғәзиз Әлмөхәмәтов тарафынан Мәскәү консервоторияһының башҡорт студияһында белем алыу маҡсатында һайлап алынған һәләтле йәштәрҙең береһе була. Чайковский исемендәге Мәскәү консерваторияһында Мәғфирә Ильяс ҡыҙы билдәле музыка белгесе В. Карин-Вешкарев класында белем ала. Уҡыуҙың беренсе көндәренән үк күренекле йырсы Ирма Яунзем башҡорт ҡыҙының тауышына, башҡарыу һәләтенә һәм образға инә белеүенә иғтибар итә. 

Мәғфирә Ғәлиева халҡыбыҙ араһында ҡыҫҡа ваҡыт эсендә киң танылыу яулай. Мәғфирә Ғәлиева – 62 халыҡ телендә йырлаған йырсы. Ул ниндәй телдә йырлай, шул халыҡтың милли кейемендә сәхнәгә сығып, образға тиҙ инеү оҫталығы менән тамашасының күңелен арбай. Йырсы ҡырҡ йылдан ашыу ғүмерен халыҡҡа йыр-моң сатҡыһы өләшеүгә бағышлай. Башҡорт моңон бар илаһилығы, мең төрлө сағыу биҙәктәре менән тамашасыға оҫта еткерә ул. 

Фәриҙә Ҡудашева, Бәхти Ғайсин, Наиль Ғәлиев һәм башҡа күренекле сәхнә әһелдәре менән башҡорт эстрадаһына нигеҙ һалыуҙа һәм үҫтереүҙә йырсы ҙур өлөш индерә. Башҡорт эстрадаһы ҡарлуғасы Башҡортостан мәҙәниәтенең илсеһе булараҡ бик күп илдәрҙе урап ҡайтып, меңәрләгән тамашасының күңелен башҡорт моңона сорнай.

Тамашала йырсының яҡташтары, ижадташ дуҫтары ҡатнаша

Инеү бушлай. Рәхим итегеҙ!