Һамар ҡалаһының Куйбышев исемендәге майҙанында Хәтер Парады үтте. Был сара йыл һайын уҙғарыла, ул 1941 йылдың 7 ноябрендә Куйбышевта үткән еңеү парадына арнала. Хәтер Парадында Муса Гәрәев исемендәге Өфө башланғыс осоу әҙерлеге биреүсе дөйөм белем биреү мәктәп-интернаты кадеттары, Октябрьский ҡалаһынан мәктәп уҡыусылары һәм студенттары ла ҡатнашты. Бөтәһе тантаналы сафта Башҡортостандан йөҙҙән ашыу кеше уҙҙы. Быйылғы Хәтер Парадында Волга буйы федераль округының бөтә төбәктәренең дә вәкилдәре, шулай уҡ Воронеж өлкәһе, Мәскәү һәм Санкт-Петербург ҡунаҡтары ҡатнашты. Куйбышев исемендәге майҙан буйлап 85 парад төркөмөндә биш меңдән ашыу кеше үтте.