Ижади бәйгене Евразия, Кипр һәм Балҡан ярымутрауының төрки телле яҙыусылар берлеге менән Төркиәнең «Заманса сәнғәт» журналы ойошторған. Былтыр сентябрҙә башланған конкурсҡа ошо көндәрҙә йомғаҡ яһалған. 

Сит ил шағирҙары араһынан жюри ағзалары ни бары ике әҙибәне - Ҡырымдан Әминә Хөсәйен менән Башҡортостандан Гөлнара Хәлфетдинованы ғына һайлап алған. Конкурсҡа йәш шағирә төрөк теленә тәржемә ителгән «Бағышлау» һәм «Бер бүре бар минең йөрәгемдә» шиғырҙарын тәҡдим иткән. Еңеүселәрҙе бүләкләү тантанаһы 28 апрелдә Төркиәнең Аланья ҡалаһында үтә. Шағирә һәм журналист Гөлнара Хәлфетдинова Әбйәлил районы ҡыҙы. Әлеге ваҡытта ул «Башҡортостан ҡыҙы» журналында бүлек мөхәррире булып эшләй. Һәләтле замандашыбыҙ шиғри йыйынтыҡ авторы. 

Шағирәне ихлас ҡотлайбыҙ һәм ижади уңыштар теләп ҡалабыҙ!