Мәжит Ғафури исемендәге Башҡорт дәүләт академия драма театры Ҡазан ҡалаһында 1 июндә башланған Төрки халыктарының XII «Наурыҙ» Халык-ара театр фестиваленә юлланды. Фестивалдә театр «Ҡара йөҙҙәр» (М.Ғафури әҫәре буйынса А.Абушахманов, Ш.Ғилманова инсц., реж. А.Абушахманов) спектакле менән 4 июндә 20.00 сәғәттә Ғ. Камал исемендәге Татар дәүләт академия театры сәхнәһендә сығыш яһай. 

«Наурыҙ» фестивале 5 июнгә ҡәҙәр бара. Унда Төркиә, Үзбәкстан, Ҡаҙағстан, Ҡырғыҙстан, Татарстан, Әзербайджан, Сыуашстан, Тыва, Ҡырым, Саха-Яҡут республикаларынан театрҙар һәм башҡа коллективтар ҡатнаша. «Был юлы фестивалгә һайлап алыу бик етди шарттарҙа үтте, тәҡдим ителгән спектаклдәр ҙә тәрән мәғәнәле булыуы менән айырыла», - тип хәбәр итә ойоштороусылар.

Ысынлап та конкурс афишаһына күҙ һалһаҡ У.Шекспир, К.Гольдони, У. Ғаджибәков, Зөлфиә, А.Тарасов, С.Айытматов, И.Ғайып, Н.Иҫәнбәт кеүек мәшһүр авторҙарҙың исемдәрен күрәбеҙ. Фестиваль көндәлеген күҙәтеп барғандан шуны әйтергә мөмкин: фестиваль тантаналы шарттарҙа, юғары кимәлдә асылып, уңышлы дауам итә, спектаклдәр жюри һәм тәнҡитселәр тарафынан бик ҡыҙыҡһынып ҡабул ителә. Сара ысын мәғәнәһендә халыҡтар дуҫлығы, рухи берҙәмлек, ижад һәм театр байрамына әүерелгән. Фестиваль 5 июндә «Театрҙың үҫеш векторы: Европа - Азия» тип аталған фәнни- ғәмәли конференция менән тамамлана.

Республикабыҙҙың төп театрына Халыҡ-ара «Наурыҙ - 2015» фестивалендә уңышлы сығыш яһауын теләйбеҙ!