Халҡыбыҙға билдәле ҡумыҙсылар әҙерләүсе, Башҡортостандың һәм Рәсәйҙең атҡаҙанған мәҙәниәт эшмәкәре, республикабыҙҙың Салауат Юлаев исемендәге дәүләт премияһы, «Донъяның виртуоз ҡумыҙсыһы» халыҡ-ара конкурсы лауреаты Роберт Заһретдиновтың «Китап» нәшриәтендә «Башҡорт өзләүе мәктәбе» исемле методик ҡулланмаһы донъя күрҙе. Автор әйтеүенсә, был китапты сығарыу теләге БР Мәҙәниәт министрлығы һәм Республика халыҡ ижады үҙәге үткәргән Төбәк-ара ҡумыҙсылар һәм өзләүселәр конкурсын ойошторған һәм үткәргән ваҡытта барлыҡҡа килгән. Өзләү — башҡорт вокаль сәнғәтенең бер төрө, башҡа төрки һәм монгол халыҡтарында ла киң таралған. Өзләү сәнғәте ярҙамында байтаҡ йырҙар һәм музыкаль әҫәрҙәр башҡарыла: оҙон көй, халыҡ марштары һәм бейеү көйҙәре, ҡош һайрауы һәм йәнлектәр тауышы. Шулай уҡ өҙләүҙе төрлө йырҙарға ҡушып ебәрәләр, ҡобайыр, эпостар башҡарғанда ҡулланалар. Өзләргә өйрәнеү еңел түгел, ул тәжрибәле остаз менән байтаҡ шөғөлләнеүҙе талап итә. XIX быуат уртаһында уҡ ул башҡорттар араһыда онотолоп барған сәнғәткә әйләнгән. Р. Заһретдиновтың был методик ҡулланмаһы өзләргә өйрәнергә теләүселәргә ярҙамсы буласаҡ. Ҡулланма башҡорт, рус, инглиз телдәрендә яҙылған.

 «Башҡортостандың мәҙәни донъяһы» порталы