Өфөнөң «Нефтсе» мәҙәниәт һарайында баҫманың 95 йыллығы айҡанлы кисә үтте.

Коллективты ҡотларға гәзит уҡыусылар йылдам йыйылды. Байрам уңайынан фойела төрлө саралар ойошторолдо. Ҡунаҡтар «Башҡортостан» гәзите тарихын, бөгөнгөһөн сағылдырған күргәҙмә менән танышты, матбуғатҡа яҙылып, бүләктәр отто. Сараның рәсми өлөшө мәҙәниәт һарайы сәхнәһендә дауам итте. Республиканың төп матбуғат баҫмаһын Башҡортостан Хөкүмәте, министрлыҡ һәм ведомство вәкилдәре, коллегалары тәбрикләне. Гәзит 1917 йылдан «Башҡорт иттифаҡи бюроһы мөхбире» исеме аҫтында сыға башлай. Артабан ул «Башҡорт», «Башҡортостан хәбәрҙәре», «Ҡыҙыл Башҡортостан», «Совет Башҡортостаны» тип үҙгәртелә. Ә инде әлеге исем аҫтында 1990 йылдан донъя күрә. Редакция хеҙмәткәрҙәренең тырышлығы, гәзит уҡыусыларының, үҙ хәбәрселәрҙең әүҙемлеге ярҙамында ул аҙнаһына биш тапҡыр утыҙ өс мең тираж менән баҫыла. Гәзитте егермеләп рубрика, тиҫтәнән ашыу махсус бит ҡыҙыҡлы һәм фәһемле итә. «Башҡортостан» гәзите рухи хазина булараҡ үҙ исеменә һәм есеменә тап төшөрмәй.