Славян, төрөк, фин-уғыр һәм башҡа халыҡтарҙың тарихи-мәҙәни үҙәктәре уңышлы эшләй. Милләтте туплаусы йәмәғәт ойошмалары йәш быуынды тәрбиәләүгә лә булышлыҡ итә. Ошондай сараларҙың береһе Федоровка районында ла үтте.
1986 йылда Чернобыль һәләкәте эҙемтәләрен бөтөрөүҙә ҡатнашҡан Николай Антошкин Советтар Союзы Геройы исеменә лайыҡ була. Федоровка районының Кузьминовка ауылы мәктәбендә хәрби авиация генерал-полковнигының музейы ла бар. Мордва милләтле яҡташыбыҙ юғары ҡаҙаныштары менән һоҡландыра.
Мордва халҡының тарихи-мәҙәни үҙәге Федоровка районында урынлашҡан. Бында мәҙәни саралар даими уҙғарыла. Районда мордва йырҙарын башҡарыусылар конкурсының тәүгә үтеүенә ҡарамаҫтан, туғыҙ райондан ҡатнашыусылар йыйылды. Ойоштороусылар билдәләүенсә, бындай саралар милли йолаларҙы, телде һәм фольклорҙы һаҡлауға ҙур этәргес булып тора.
Республикала 20 меңдән ашыу мордва йәшәй. Улар башлыса Федоровка районында тупланған. Милли телдә белем биргән мәктәптәр ҙә бар. Унда белем алған уҡыусылар туған теле буйынса төбәк-ара олимпиадаларҙа һынатмай. Ҡул эштәре буйынса ла алдынғылар рәтендә. Уларҙы һәр кем күргәҙмәлә күрә алды.
Милли сараларҙың уҙғарылыуы бик әһәмиәтле, тип билдәләй белгестәр. Сит төбәктәрҙә йәшәгән халыҡтар өсөн туған йыр-моңдо ишетеү рухи көс бирә, йәш быуынды тәрбиәләүгә булышлыҡ итә. Шуға күрә бындай сараларҙы даими уҙғарыу - заман талабы.