Кемдәр генә юҡ унда! Бына Башҡортостан Республикаһы Президенты Рөстәм Хәмитов ҡатыны Гөлшат ханым һәм Мәжит Ғафури исемендәге Башҡорт дәүләт драма театрының баш режиссеры Олег Ханов менән мөкиббән китеп тамаша күҙәтә. Уларҙы Айраттың үткер күҙе “Мыҡтымһылыу, Әбләй һәм Ҡара юрға” спектаклен ҡараған мәлдә эләктереп алған. 

Саҡ ҡына башты борһаҡ, иғтибарҙы Башҡортостандың халыҡ шағиры Мостай Кәримдең фоторәсеме йәлеп итә. Мостай ағайыбыҙҙың үҙенә генә хас ихлас йылмайыуынан күңелдәргә яҡтылыҡ бөркөлә. 

Артабан... Туҡта, бөтә серҙе асып, “аш”тың тәмен ебәрәһең бит! Күргәҙмәне ҡарарға килеүселәр үҙ күҙҙәре менән күреп, үҙҙәре ләззәт һәм һоҡланыу кисерһен. Сөнки матурлыҡ менән ҡауышҡанда аралашсылар кәрәкмәй! 

Күргәҙмәне асыу тантанаһы ғәләмәт шәп булды. Килгән ҡунаҡтарҙың барыһы ла һоҡланыуҙан тел шартлатмай ҡалмағандыр. Айрат Нурмөхәмәтов ижады менән ҡыҫҡаса ғына таныштырғандан һуң, гәзиттең баш мөхәррире Нияз Сәлимов күргәҙмәне асып, Башҡортостандың мәҙәниәт министры Әминә Шафиҡова менән республика Президенты Хакимиәтенең ижтимағи-сәйәси үҫеш идаралығы етәксеһе Данил Азаматовҡа һүҙ бирҙе. Ҡунаҡтар күргәҙмәнең халыҡтар араһында дуҫлыҡты нығытыуҙа, рухи ҡиммәттәрҙе таратыуҙа әһәмиәтен баһаланы. Ә инде Башҡортостандың халыҡ артисы Әлфиә Юлсурина башҡарыуында халыҡ йыры тантаналы сараға йән өрөп ебәрҙе.

Автор: С. НӘЗИРОВ.

Сығанаҡ: "Башҡортостан" гәзите