Төп Яңы йыл тамашаһы – Президент шыршыһы быйыл 21 декабрҙә «Нефтсе» мәҙәниәт һарайында үтәсәк. Унда 780 бала ҡатнашасаҡ. Йола буйынса улар иҫәбендә айырыуса һәләтле балалар, төрлө конкурстарҙа, ярыштарҙа һәм олимпиадаларҙа еңеүселәр, балалар йорттарында тәрбиәләнеүселәр, аҙ тәьмин ителгән ғаиләләрҙән булған балалар, шулай уҡ хеҙмәт бурысын үтәгәндә һәләк булғандарҙың балалары. Был хаҡта Башҡортостан Республикаһы Мәғариф министрлығының тәрбиә һәм өҫтәмә белем биреү бүлегенең баш белгес-эксперты Рәмзиә Бикҡужина хәбәр итте.
Спектакль рус һәм башҡорт әкиәттәре буйынса ҡуйыласаҡ. Изгелек һәм яуызлыҡ тураһындағы хикәйәне балаларға Башҡорт дәүләт ҡурсаҡ театры, Мостай Кәрим исемендәге Милли йәштәр театры актерҙары һәм баш ҡаланың балалар ижади коллективтары актерҙары тәҡдим итәсәк.
Ҡыш бабай ролендә — Рәсәй Федерацияһының һәм Башҡортостан Республикаһының халыҡ артисы Хөрмәтулла Үтәшев, ә уның ейәнсәре Ҡарһылыу ролендә Милли йәштәр театры актрисаһы Гөлшат Ғайсина уйнаясаҡ.
Башҡортостан Республикаһының Мәҙәниәт министрлығынан хәбәр итеүҙәренсә, балалар спектакленең режиссеры – Илшат Фәхертдинов. Сценарий авторы – Дәүләт академия рус драма театры хеҙмәткәре – Владимир Аношкин.
Сәхнәләге төп тамашанан тыш, балаларҙы «Нефтсе» фойеһында күңел асыу программаһы ла көтә.
Байрам аҙағында һәр йәш ҡунаҡҡа Башҡортостан Президентынан бүләк тапшырыласаҡ.
Был спектакль шулай уҡ 22 декабрҙә — ҡала шыршыһында, ә 23 декабрҙә социаль шыршы байрамында күрһәтеләсәк.
Әйткәндәй, Яңы йыл постановкалары ҡаланың барлыҡ театр сәхнәләрендә үтәсәк. Әлеге ваҡытта һәр ижади коллектив балалар өсөн ҡыҙыҡлы һәм сағыу тамаша әҙерләй.
Автор: Эльмира Сабирова
«Башинформ»