17 һәм 24 майҙа Өфө сәнғәт училищеһының Концерт залында (Пушкин урамы, 103 а) Башҡортостан Республикаһының Милли симфоник оркестры ойошторолоуға 20 йыл тулыуға арналған юбилей концерттары үтә.

Өфөлә 1992 йылда яңы оркестр эшләй башлай. Коллективҡа Өфө, Мәскәү, Санкт-Петербург, Екатеринбург, Ҡазан ҡалаларының музыкаль юғары уҡыу йорттарын тамамлаған йәш музыканттар йәлеп ителә. 

Бөгөнгө көндә был  юғары профессиональ оркестр. Уның һәр сығышын халыҡ көтөп ала. Рәсәй, сит ил музыканттары килеп был оркестрҙа уйнау мөмкинлеге алалар. Әйтәйек, Рәсәй Федерацияһының халыҡ артисы, профессор Рауил Мартынов, АҠШ-тың Теннесси штатынан симфоник оркестрҙың баш дирижеры Джон Додсон, Амстердамдан (Нидерландтар) Александр Вакульский һәм шулай уҡ Ҡазан, Мәскәү ҡалаларынан байтаҡ ҡына музыканттар килеп уйнай. Килгән береһе оркестрҙа уйнаусыларҙың оҫталығын билдәләйҙәр. Оркестр башҡорт, рус, сит ил композиторҙарының әҫәрҙәрен башҡара.

Коллективтың художество етәксеһе һәм баш дирижеры – Рөстәм Сөләймәнов.