25-26 августа Өфөнөң «Аҡбуҙат» алдындағы асыҡ майҙанда «Башҡортостан – Рәсәйҙең баллы иле» фестивале үтте. Сараның төп маҡсаты - үҙебеҙҙә етештерелгән продукцияны тәҡдим итеү, халыҡты сифатлы умартасылыҡ продукттары менән тәьмин итеү, республиканың баш ҡалаһы менән Башҡортостан райондары араһында эшлекле һәм мәҙәни бәйләнештәрҙе нығытыу.

Фестиваль программаһы сиктәрендә 25 августа XII Республика умартасылар конкурсы, VI «Йәш умартасы» республика конкурсы һәм «Баллы Башҡортостан» күргәҙмә-йәрминкәһе, байрам концерты ойошторолдо. Концертта танылған эстрада йондоҙҙары Артур Туҡтағолов, Миңзифа Исҡужина, «Ант», «Мираҫ» төркөмдәре һ.б. билдәле артистар ҡатнашты.

Шулай уҡ байрамға 150 килограмлыҡ республикалағы иң ҙур сәк-сәк әҙерләнгәйне. Масус әҙерләнгән татлы ризыҡтан Башҡортостан Республикаһы Президенты Рөстәм Зәки улы Хәмитов һәм байрамға килеүсе һәр кем ауыҙ итте. 

«Башҡортостандың мәҙәни донъяһы» порталы