16-19 ноябрҙә Төркиәнең Чанаккале ҡалаһында IV Халыҡ-ара шиғриәт форумы үтте, унда Башҡортостан вәкилдәре лә ҡатнашты: башҡорт шағирәһе, Ш.Бабич исемендәге дәүләт йәштәр премияһы лауреаты Тәнзилә Дәүләтбирҙина, Башҡортостандың Әзербайжан милли-мәҙәни үҙәге идараһы рәйесе урынбаҫары, Әзербайжан Яҙыусылар союзы ағзаһы Балоглан Рзаев һәм БР Мәҙәниәт министрлығының ТӨРКСОЙ-ҙағы вәкиле Азат Сәлихов. Сараны ойоштороусылар булып Чанаккале ҡалаһының «Академия» шиғриәт йәмғиәте һәм ТӨРКСОЙ Халыҡ-ара ойошмаһы сығыш яһай. Шағирә Тәнзилә Дәүләтбирҙина әйтеүенсә, шағирҙар Гелиболу ярымутрауында урынлашҡан Милли тарихи паркта булған. Шиғриәт байрамы сиктәрендә 18 март исемендәге университет ректоры, губернатор һәм ҡала мэры менән осрашыҙар ойошторолған. Чанаккале һәм Лапсеки ҡалаларының шиғриәт һөйөүселәре төрки телле шағирҙарҙы йылы ҡабул иткән. Билдәле әзербайжан шағиры Мамед Исмаил Тәнзилә Дәүләтбирҙинаның шиғырҙарын төрөк теленә тәржемә итеп, матбуғатта баҫтырып сығарырға теләк белдергән.