Башҡортостан яҙыусылары күренекле шәхес Әхмәт-Зәки Вәлиди музейында осрашыу үткәрҙе. Был музей шәхестең тыуған ерендә, Вәлидовтар ғаиләһе торған элекке өй урынында, 1990-сы йылда яңынан төҙөлгән, Ишимбай районының Көҙән ауылында урынлашҡан.
Өфөнән Зәки Вәлидиҙең тыуған ауылына, яҙыусылар союзы председателе Риф Тойғонов етәкселегендәге, ҙур делегация барған. Ҡунаҡтар музейҙың экспонаттары, З. Вәлидиҙең заманында үҙе ҡулланған кәрәк-яраҡтар, фотолар, документтар менән танышҡан. Яҙыусылар З. Вәлиди үҙе башҡарған йырҙы тыңлап хайран ҡалдылар, уларҙың әйтеүе буйынса, Зәки Вәлидиҙең тауышы көслө һәм моңло булған.
Музейҙың төп залында, З. Вәлидиҙең беренсе Башҡорт хөкүмәте составында эшләгән ваҡыттағы эш кабинеты ла урынлашҡан, өҫтәл артында уның восктан эшләнгән фигураһы ла урын алған. Шулай уҡ музейҙа ҡайһы бер экспонаттар З. Вәлиди йәшәгән ваҡыттағы тормоштан алынған.
Экскурсия бөткәс, яҙыусылар ауыл халҡы менән осрашыу үткәрҙе. Улар З. Вәлидиҙең иҫтәлеген һаҡлап барған өсөн, ауыл халҡына үҙҙәренең рәхмәтлеген белдерҙе. Әлбиттә, сәхнәнән шиғырҙар һәм бөйөк шәхестең тормошонан алынған иҫтәлектәр яңғыраны. Риф Тойғонов яҙыусылар бындай традицияны һаҡлап, йыл һайын, Башҡортостанда урынлашҡан бөтә әҙәби музейҙарға барырға тигән маҡсат та ҡуйҙы. «Башҡортостандың мәҙәни донъяһы» порталы