Республикабыҙҙа халҡыбыҙҙың бөйөк мәғрифәтсеһе Мифтахетдин Аҡмулла иҫтәлегенә бағышланған саралар башланды. Йыл да үткәрелә килгән сараның быйылғыһы шағирҙың 180 йыллығына арнала.
М.Аҡмулла исемен йөрөтөүсе Башҡорт дәүләт педагогия университетынан хәбәр итеүҙәренсә, программа сиктәрендә Аҡмулланың, уның мәғрифәтселек дәүеренә арналған тематик күргәҙмәләр, әҫәрҙәренә нигеҙләнгән башҡорт теле һәм әҙәбиәте буйынса асыҡ дәрестәр, шиғырҙар конкурсы, конференциялар, түңәрәк өҫтәлдәр ойоштороласаҡ.
12 декабрҙә, университетта «М.Аҡмулла һәм мәғрифәтселек дәүере» экспозицияһы үҙ эшен башланы ла инде. Унан һуң М. Аҡмулла исемендәге премияның лауреаты, БДПУ-ның башҡорт әҙәбиәте һәм мәҙәниәте кафедраһы доценты Әхәт Вилданов онлайн-конференция үткәрәсәк.
13 декабрҙә, Өфөнөң 9-сы урта дөйөм белем биреү мәктәбендә төрки халыҡтар поэзияһы кисәһе уҙғарыласаҡ.
14 декабрҙә БДПУ-ла 5-11 синыф уҡыусылары араһында Аҡмулланың ижады буйынса интернет-олимпиада үтәсәк.
15 декабрҙә «Фольклор һәм әҙәбиәттә дини, мифологик мотивтар» тип аталған түңәрәк өҫтәл ойоштороласаҡ.
16 декабрҙә БР Дәүләт Йыйылышы – Ҡоролтай йортонда «Мәғрифәтселәрҙең мәҙәниәттәге һәм мәғарифтағы гуманистик мираҫы» исемле халыҡ-ара ғилми-ғәмәли конференция үтәсәк. Уның сиктәрендә алты секция эшләйәсәк.
16 декабрҙә Өфөлә «Башҡортостан – дуҫлыҡ бишеге» фольклор байрамы уҙғарыласаҡ.
17 декабрҙә Аҡмулланың тыуған яғы - Миәкә районында «Аҡмулла нәсихәттәре» байрамы үтәсәк.
БДПУ-нан хәбәр итеүҙәренсә, халҡыбыҙҙың бөйөк мәғрифәтсеһе Мифтахетдин Аҡмулла иҫтәлегенә бағышланған сараларҙа Мәскәү, Һамар, Магнитогорск, Екатеринбург, Ҡаҙан, Саранск, Ырымбур, Сургут, Ижевск, Ярославль, Яр Саллы, Ҡаҙаҡстан, Үзбәкстан, Төркиәнән ҡунаҡтар ҡатнашасаҡ. «Башҡортостандың мәҙәни донъяһы» порталы