4 июль көндө Ҡырмыҫҡалы районының Бишауыл-Уңғар ауылында икенсе йыл рәттән "Сыңла, салғы!" республика салғысыларының фольклор байрамы уҙасаҡ. Унда йыйылма команда һәм ғаилә салғысылары көс һынашасаҡ. 

Байрамды Башҡортостан Республикаһының Мәҙәниәт министрлығы, Республика халыҡ ижады үҙәге, Ҡырмыҫҡалы районы хакимиәте ойоштора. Байрамдың маҡсаты - халыҡ фольклорын һаҡлау һәм үҫтереү, милли йола һәм ғөрөф-ғәҙәттәрҙе популярләштереү һәм пропагандалау. Байрамдың төп бурысы - ғәҙәти бесән сабыу мәҙәниәтен һәм бесән мәлен реконструкциялау, халҡыбыҙ йолаларын һәм ғәҙәттәрен яңыртыу, фестиваль ҡунаҡтарын һәм ҡатнашыусыларҙы бесән мәле атмосфераһына интерактив һәүәҫләндереү.

Шулай уҡ тәбиғи "Стог — лэнд-арт-объект" ландшафтына ярашлы һынлы сәнғәт биҙәлешен ҡулланып күбә һалыу ҙа ҡаралған, тип хәбәр итәләр Республика халыҡ ижады үҙәгенән. Шулай уҡ был байрамда маҡсатҡа ярашлы, ижади майҙансыҡ та яһаласаҡ. Был майҙансыҡ сәләмәт тормошто популярләштереү, шифалы үләндәрҙе, дауалау сифаттарын өйрәнеү, халыҡты был файҙалы үләндәрҙе йыйыу, уны нисек итеп дөрөҫ ҡулланыуғы өйрәтеү йәһәтенән эшләнәсәк. 

Шулай уҡ сәй ихатаһы ла эшләнәсәк. Һәм был ихатала шифалы сәй етештереүселәр көс һынашасаҡ. Шулай уҡ тамашасылар ҙа, нисек итеп үлән сәйен яһарға, уны көнкүрештә нисек ҡулланыуҙы өйрәнә аласаҡ. Был бәйгеселәр араһынан үлән сәйе белгесе һәм иң йәш, иң өлкән, шулай уҡ иң күренекле үләнсе билдәләнәсәк.

Ә инде кемдәр теләй, төрлө сәскәләрҙән, шифалы үләндәрҙән миндек бәйләү буйынса оҫталыҡ дәрестәрендә лә ҡатнаша ала. Был байрамда иң мөһиме - сифатлы һәм файҙалы үләндәрҙе танырға һәм уны көндәлек ҡулланышҡа индереү.