Башҡортостанда ислам динен тотоусолар артыуын, йәштәр араһында мосолман диненә килеүселәр күплеген, диндең, әҙәп-әхлаҡты ҡайтарыуҙың бер юлы икәнлеген иҫәпкә алып, баш ҡалабыҙ Өфө эргәһендә 2000 студентҡа иҫәпләнгән дини белем биреү үҙәге төҙөлөүе ихтимал. Был хаҡта «XXI быуаттың мәғариф киңлегендә ислам идеалдары һәм ҡиммәттәре» VIII Халыҡ-ара ғилми-ғәмәли конференцияһын асыу тантанаһында Рәсәй мосолмандарының Үҙәк диниә назараты рәйесе, баш мөфтөй Тәлғәт Тажетдин хәбәр итте. Башҡортостанда бер нисә йыл инде Волга буйы федераль округындағы мосолман дин әһелдәренең квалификацияһын күтәреү буйынса округ үҙәге, Рәсәй мосолмандары Үҙәк диниә назаратының Рәсәй ислам университеты уңышлы эшләгәнлеге, «Ғәлиә», Мәрйәм Солтанова исемендәге мәҙрәсәләр, йәкшәмбе мәктәптәре булыуы, уларҙың илдә иң яҡшы дини белем биреү традицияларын дауам итеүе билдәле. Ошо арҡала, дини белем биреү үҙәген төҙөү ҙә тормошҡа ашыуы бар. Был, үҙәккә Башҡортостан ғына түгел, ә Рәсәй һәм уның башҡа төбәктәре, башҡа илдәрҙән дә халыҡ ағыласағына ишара.