Лилиә Фатихова - сатира һәм юмор өлкәһендә ҙур танылыу яулаған билдәле артист. Ул 35 йылға яҡын ғүмерен сәхнәгә бағышлай. Тамашасы уның концерттарына тормош мәшәҡәттәренән бер аҙ арынып, кәйефләнеп, йәнләнеп, күңелдәрҙе елкендереү өсөн ашыға. 

Нәфис һүҙ оҫтаһының репертуары шаҡтай бай. Лилиә Фатихова Р.Ғәрипов, Ә.Атнабаев кеүек башҡорт классиктарының, С.Итбаев, Ф.Иҡсанов, Р.Тимершин, М.Сәлим, Т.Миңнуллин һәм башҡа хәҙерге авторҙарҙың лирик-драматик, сатирик әҫәрҙәрен оҫта башҡара. Уның юғары актерлыҡ һәләте ҡыҫҡа ваҡыт эсендә сағыу, ҡабатланмаҫ ҡатын-ҡыҙ образдары тыуҙырыуға булышлыҡ итте. Лилиә Фатыхова тарафынан “Эскесе” интермедияһында эскесе ҡатыны, ҡәйнә, бәләкәй ҡыҙ һәм башҡа бихисап ябай һәм шул уҡ ваҡытта тәрән психологик образдар тамашасыны берсә көлдөрә, берсә илата. Йәмғиәттәге етешһеҙлектәрҙе фашлау, ғаилә, кеше араһындағы мөнәсәбәттәрҙе сатира һәм юмор аша күрһәтеүгә уңышлы ирешә ул. Фатиховтарҙың ғаилә концерты, Х.Фатиховтың юбилей кисәһе, таетраллаштырылған “Лилиә Фатыхова никах яңырта”…Һанай китһәң эс ҡатырғыс пародияларға, мәҙәкле һәм ҡыҙғаныс күренештәргә, йыр-моңға бай дәртһеҙҙәрҙе дәртләндерер, күңелдәргә йәм өҫтәр бихисап тамашалар шәлкемен әҙерләп тамашасыға бүләк итте.

Шулай уҡ Лилиә Фатихова “Ихлас” төркөмөнә нигеҙ һалыусыларҙың береһе. Был төркөм менән бергә ул Башҡортостандың район-ҡалаларын урап сыға. Бөгөнгө көндә сәхнә оҫтаһы Фәдис Ғәниев төркөмө составында сығыш яһай. 

Лилиә Фатыхова ижади эҙләнеүҙән туҡтамай һәм тамашасыларҙы көлкө көнөнә арналған сираттағы үҙенсәлекле театраллаштырылған тамашаға саҡыра. Уйын-көлкөгә, йыр-моңға бай тамашаға рәхим итегеҙ, дуҫтар!