Башҡортостандың халыҡ артисы Радмир Бәҙретдинов 80 йәшлек юбилейын билдәләне. Ошо уңайҙан арҙаҡлы бейеүсе Хөсәйен Әхмәтов исемендәге Башҡорт дәүләт филармонияһында зал тултырып тамашасы йыйҙы. 

Радмир Бәҙретдинов - киң танылыу алған халыҡ бейеүсеһе. Ижад юлын актер булараҡ башлаған шәхестең күңеле бейеү сәнғәтенә тартыла. Өфө сәнғәт училищеһының актер бүлеген тамамлағандан һуң Фәйзи Ғәскәров исемендәге Башҡорт дәүләт академия халыҡ бейеүҙәре ансамбле солисы булып эш башлай. Уның башҡарыуындағы «Сәкәй»ҙәге бай малайы, «Ғашиҡ төҙөүселәр»ҙәге балта оҫтаһы, «Өс туған» бейеүендәге шаян бабай образдары әле булһа халыҡ хәтерендә 

Юбилярҙы ҡотларға йәмәғәт вәкилдәре, бейеү сәнғәтен үҙ итеүсе тамашасылар, коллегалары йыйылды. Бейеү һәм йыр менән үрелеп барҡан ижад кисәһендә Фәйзи Ғәскәров исемендәге Башҡорт дәүләт академия халыҡ бейеүҙәре ансамбленән тыш, Учалы районы, Стәрлетамаҡ бейеү театры оҫталары сығыш яһаны. 

Радмир Бәҙретдинов әле лә бейеү сәнғәте тип янып йәшәй. Был тәңгәлдә илһамланып, киң яҡлы эшмәкәрлек алып бара. «Байыҡ» республика телевизион бейеү бәйгеһе баһалама ағзаһы булараҡ, башҡорт бейеүҙәрен һаҡлауға, халыҡ ынйыларын халыҡҡа еткереүгә ҙур өлөш индерә. Йәш быуын менән һөнәри маһирлығын бүлешә.

Розалия Йәнбәкова
Башҡортостан юлдаш телевидениеһы