Бөгөн, 31 августа «Комсомольская прада» гәзите «Башҡортостандың милли театры: театр репертуарында үҙгәрештәр, актерҙар составы, киләсәккә пландар... » тигән темаға пресс-конференция үткәрҙе. Осрашыуҙа М. Ғафури исемендәге Башҡорт дәүләт академия драма театрының художество етәксеһе Олег Закир улы Ханов, театрҙың ҡуйыусы-режиссеры Айрат Әхтәм улы Абушахманов, БР халыҡ артисы, актер Илдар Ибраһим улы Ғүмәров ҡатнашты. 

Театр коллективының киләсәккә пландары бик ҙур. Быйыл да ул тамашасыларҙы премьералар менән йыш ҡыуандырасаҡ. Әлеге ваҡытта театрҙа эш гөрләй - 2 спектакль әҙерләнә. Улар – «Эдип батша» (Софокл, режиссеры Искәндәр Сакаев) һәм «Бирнәһеҙ ҡыҙ» (А. Островский, режиссеры Олег Ханов).

Ә 20 сентябрь көндө театр үҙенең 93-сө ижад миҙгелен «Эдип батша» спектакленең премьераһы менән асасаҡ! Ә унан да алда, 6-13 сентябрҙә Төрки телле театрҙарҙың V халыҡ-ара «Туғанлыҡ» фестивалендә ҡатнашасаҡ! 

Бының менән генә театрҙа яңылыҡтар бөтмәй. Быйылғы йылда ла яратҡан тамашасыларына театр 5-6 яңы премьера тәҡдим итәсәк.

Автор: Гөлназ Ишемғужина
«Башҡортостандың мәҙәни донъяһы» порталы