Ойошма республиканан ситтә йәшәүсе яҡташтарыбыҙҙы бергә туплау, тарихи тамырҙарын, телен, милли-мәҙәни байлыҡтарын һаҡлау һәм киләсәк быуынға тапшырыу маҡсатында ойошторола. Әле Ҡазанда үҙәктең юбилейына әҙерлек бара.

Билдәле дәүләт һәм йәмәғәт эшмәкәре, шағирә Фирҙәүес Бәширова Татарстан тарихын тыуған Башҡортостаны һымаҡ белә. Ишембай ҡыҙы 3 тиҫтә йылға яҡын Ҡазанда йәшәй. Тап Фирҙәүес Тимербулат ҡыҙы күрше республикала башҡорттарҙың милли-мәҙәни үҙәген асыуға күп тырышлыҡ һала.

Әле Татарстанда 14 меңдән ашыу башҡорт йәшәй. Ике тиҫтә йыл элек ойошторолған «Башҡорт йорто» иһә тыуған төйәгенән ситтә төпләнеүсе яҡташтарыбыҙҙы туплаусы йылы усаҡҡа әүерелгән. Ойошманың Ҡазандан башҡа ҡалаларҙа филиалдары ла эшләй.

21 апрелдә Ҡазандағы «Башҡорт йорто» 20 йыллыҡ юбилейын билдәләй. Һәр байрамдағы кеүек башҡорт халыҡ йолалары, йыр-бейеүҙәр әҙерләнә. Әммә эш байрамда түгел, ойошма йылдар үтһә лә, үҙенең тәүмаҡсатын юғалтмай. Татарстанда йәшәүсе милләттәштәребеҙҙе берләштереүсе, телде, тарихи-мәҙәни хазиналарыбыҙҙы тергеҙеүсе, һаҡлаусы һәм быуындан-быуынға тапшырыусы рухи үҙәк булып ҡала.

Сығанаҡ: Башҡортостан юлдаш телевидениеһы