Борай районы үҙәгенең Рәйфә Ғәлиева исемендәге мәҙәниәт йортонда ҙур тамаша үтте. Байрам концерты урындағы «Дуҫлыҡ» халыҡ бейеүҙәре ансамбленең етенсе сығарылышына ла арналды.

Борай районы мәҙәниәт йортонда барыһы өс ижади коллектив эшләй. «Дуҫлыҡ», «Эдельвейс» һәм «Ынйы» балалар бейеүе ансамблдәре - райондың йөҙө, иң сағыу коллективтарының береһе, тип билдәләне сарала ҡатнашыусы ҡунаҡтар.

Был уңыштың сере ижади коллективтың художество етәксеһе Маргарита Ғәндалипова менән Радик Бакировтың тырышлығына бәйле. Улар ансамблгә килгән тәрбиәләнеүселәренең оҫталығын юғары кимәлгә күтәрә. Әйткәндәй, борайҙар республика кимәлендә уҙғарылған бер саранан да ситтә ҡалмай. «Башҡортостан – Урал ынйыһы», «Салауат йыйыны» кеүек байрамдарҙа даими ҡатнаша.

«Дуҫлыҡ» ансамбле репертуарында 25-кә яҡын бейеү бар. Бейеүселәр башҡорт, татар, рус, ирланд, украин, мордва халыҡтары бейеүҙәрен яратып башҡара. Ижади коллектив тәрбиәләнеүселәре бейеү сәнғәтен, тормошо асылы, рухи байлыҡ сығанағы тип ҡабул итә.

Бейеү - күңел көҙгөһө. Был хаҡлыҡты борайҙар яҡшы белә. Район мәҙәниәт йорто тәрбиәләнеүселәре әйтеүенсә, бейеү сәнғәте кешене йәшәтә һәм йәшнәтә. Бөгөнгө сара быға асыҡ миҫал булып торҙо.

Cығанаҡ: Башҡортостан юлдаш телевидениеһы