«Берҙәмлек–Содружество» Халыҡ-ара фестивале Башҡортостанда ғына түгел, тотош Рәсәйҙә мөһим саралар иҫәбендә. Мәҙәниәт фестивале халыҡ ижадын, кәсептәрен, биҙәү-ҡулланма сәнғәтен популярлаштырыу, ижади коллективтар менән ныҡлы бәйләнештәр булдырыу, төрлө мәҙәниәттәр һәм йолалар менән танышыу, мәҙәни яңылыҡтар менән уртаҡлашыу кеүек изге маҡсаттар ҡуя. Халыҡ-ара берҙәмлек байрамын РФ һәм БР Мәҙәниәт министрлыҡтары, Рәсәй Дәүләт халыҡтар дуҫлығы йорто, Республика халыҡ ижады үҙәге, Ғафури, Ишимбай райондары һәм Өфө, Салауат, Күмертау ҡалалары хакимиәттәре ойоштора.

Фестивалдә Рәсәйҙән генә түгел башҡа төбәктәрҙән дә ҡатнашалар. Быйыл Ҡаҙағстан, Ҡырғыҙстан, Ҡытай, Латвия, Нигерия, Һиндостан, Польша, Таджикистан, Төркиә, Төнъяҡ Осетия, Үзбәкестан, Чада кеүек илдәрҙән ҡатнашыусылар көтөлә.

«Берҙәмлек–Содружество» республикала үткән быуаттың 90-сы йылдарынан үткәрелә. Быйыл ул 7–12 июндә үтә. Ишембай районында байрамды асыу тантанаһы һәм ҡунаҡтар ҡатнашлығында тантаналы парад һәм концерт көтөлә. Ҡатнашыусылар Ғафури районында һабантуй һәм уның йолалары менән танышасаҡ. Салауат ҡалаһында «Юрматы ере» мемориаль комплексына экскурсия һәм сәскәләр һалыу планлаштырыла. Күмертау ҡалаһында ҡунаҡтарҙы милли-мәҙәни ойошмалар менән осрашыу, ҡала буйлап экскурсия көтә. Халыҡ-ара фестиваль 12 июнь Өфөлә В.Ленин исемендәге майҙанда Гала-концерт менән тамамланасаҡ.