29 февралдә, «Китап» нәшриәтенең фирма магазинында (Октябрь проспекты, 2) билдәле ҡумыҙсы Роберт Заһретдиновтың күптән түгел донъя күргән  «Башҡорт өзләүе мәктәбе» китабы  презентацияһы үтте.
Роберт Заһретдинов – Салауат Юлаев исемендәге дәүләт премияһы лауреаты, Рәсәй Федерацияһының һәм Башҡортостан Республикаһының атҡаҙанған мәҙәниәт хеҙмәткәре, РФ һәм РБ мәғариф отличнигы, халыҡ-ара өзләү фестивалдәрендә еңеүсе, «Донъяның виртуоз ҡумыҙсыһы» халыҡ-ара конкурсында биш тапҡыр лауреат исемен яулаусы. «Ҡумыҙҙа уйнау мәктәбе» китабы өсөн Д.Сорос исемендәге халыҡ-ара премияға лайыҡ булды.
«Башҡорт өзләүе мәктәбе» китабы презентацияһына авторҙың дуҫтары,  академик Әхмәт Сөләймәнов, профессор М. Алкин һәм сәнғәт һөйөүселәр килгән ине.
Презентацияға килеүселәр башҡорт өзләү сәнғәте тураһында тулыраҡ мәғлүмәт алды, шулай уҡ Роберт Заһретдинов  китапты баҫтырырға ярҙам күрһәтеһеүселәргә рәхмәтен белдерҙе.
Һуңынан саҡырылған ҡунаҡтар сығыш яһап, фекерҙәре менән уртаҡ­лаштылар. Сығыш яһаусылар китаптың өзләргә өйрәнергә теләүселәргә бик ҙур ярҙамсы буласағын билдәләнеләр. «Башҡортостандың мәҙәни донъяһы» порталы