Баш ҡалала билдәле халыҡ яҙыусыһы Зәйнәб Биишева хөрмәтенә бюст ҡуйыласаҡ. Был мемориаль ҡоролма Октябрь проспектындағы 2-се һәм 4-се йорттар янында урынлаштырыласаҡ. Әле ҡала хакимиәтенең коммуналь хужалыҡ һәм төҙөкләндереү буйынса идаралығы хеҙмәткәрҙәре бюст проектын әҙерләү өсөн заявка биргән. Уның бейеклеге 2 метр 80 сантиметр буласаҡ һәм 144 квадрат метр майҙанда урынлаштырыласаҡ. Бюст бронзанан ҡойоласаҡ, уға илткән баҫҡыстар, пандустар һоро граниттан эшләнәсәк. Мемориал янында торшер тибындағы ике суйын фонарь ҙа ҡуйыласаҡ.