Башҡорт хореографияһының һәм балет сәнғәтенең иң башында тороусыларҙың береһе, атаҡлы хореограф, балетмейстер, кисә генә 94 йәшен тултырған Хашим Мостаев бөгөн дә егеттәр кеүек дәртле, хәрәкәтсән.

Күптән түгел «Башинформ» мәғлүмәт агентлығында Хашим Фәтих улының дуҫтары, замандаштары, сәнғәт оҫталары, журналистар, яҙыусылар ҡатнашлығында “Далекое и близкое” тигән хәтирәләр альбомының исем туйы үтте. 750 битле был китапты автор укытыусыһы Фәйзи Ғәскәровтың 100 йыллығына бағышлаған һәм хронологик тәртиптә Башҡортостан хореографияһының һәм классик балетының үҫеш баҫкыстарын һүрәтләгән. Ул тарихта эҙ ҡалдырған сәнғәт эшмәкәрҙәренең театр, эстрада, филармония артистарының исемдәрен матур хәтирәләрҙә яҡтыртҡан. Альбомда автор үҙе ҡуйған бейеүҙәр һәм балет сәнғәте тураһында иҫтәлектәре менән дә уртаҡлаша. Китаптың беренсе өлөшө яҙыусы, ижадташ дуҫы Мостай Кәрим менән булған иҫтәлектәргә бағышлана. 

Байрамда Хашим Фәтих улы тураһында бик күп йылы һүҙҙәр әйтелде.

Барлыҡ сығыш яһаусылар ҙа “Далекое и близкое” альбомының тәрән эстәлекле булыуына, матур биҙәлешенә иғтибар итте һәм авторҙың бөгөн дә шулай дәртле, матур, етеҙ булыуына һоҡланды. 

«Башҡортостандың мәҙәни донъяһы»