Башҡорт халыҡ йырҙарын бар нескәлегендә һәм матурлығында оҫта башҡарыусы, билдәле йырсы Радик Вәлмөхәмәтовты белмәгән кеше юҡтыр. Йырсы башҡарыуындағы моңло йырҙар халыҡ тарафынан ихлас ҡабул ителә. Шулай уҡ Радик Вәлмөхәмәтов йырсы ғына түгел, ә төркөм етәксеһе лә. Күп йылдар “Ихлас” төркөмөн етәкләгән өлгөр сәнғәт әһеле бөгөнгө көндә “Сармат” исемле яңы төркөм туплап ижад юлын дауам итә. Яңы ғына барлыҡҡа килгән коллектив республикабыҙҙың район-ҡалалары буйлап гастроль концерттары менән сәфәргә сыға, йырҙар яҙҙыра - бер һүҙ менән әйткәндә янып ижад итә. 

Төркөмдә үҙ һөнәрен мөкиббән яратҡан оҫта музыканттар йыйылған. Ҡурайҙа - Башҡортостандың атҡаҙанған артисы, билдәле ҡурайсы - Рушан Биктимеров, баҫмаҡлы музыка ҡоралында һәм саксофонда - Фәрхәт Ишбирҙин, һуҡма музыка ҡоралында – Юрий Реут, бас гитарала- Алексей Попов, соло-ритм-гитарала – Шамил Ҡорбанов. 

“Сармат”тың концерттарында күңелдәрҙең иң нескә ҡылдарын тирбәлтер моңло йырҙар яңғырай. Төркөмдөң репертуарында төрлө йүнәлештәге йырҙар урын алған: “Нисек барһың тик шулай бул”, “Атай-әсәйҙәрҙе онотмайыҡ”, “Һин онотма ерҙә мин барын”, “Аҡсарлаҡ”, “Ҡәнәферҙәр”, “Һин онотма ерҙә мин барын” кеүек ретро йырҙар, “Сәлимәкәй”, “Сибай”, “Йәмәлекәй тауы”, “Урал” заманса эшкәртелгән халыҡ ынйылары. Бар йырҙарҙа тере тауыш менән башҡарыла. Радик Вәлмөхәмәтов һәм “Сармат” төркөмөнөң йыр-моң тамашаһына рәхим итегеҙ, дуҫтар!