Кисә, 4 ноябрҙә, Конгресс-холда Халыҡтар берҙәмлеге көнөнә арналған матур байрам сараһы булып уҙҙы. Саҡырыу буйынса, был байрам концертына теләгән һәр кем инә алды. Залға республикала йәшәүсе төрлө милләт вәкилдәре йыйылғайны. Уларҙың күбеһе милли костюмдарҙа, үҙ халҡының милли флагы менән, күтәренке кәйефтә ине. БР башлығы Рөстәм Хәмитов республика халҡын һәм йыйылыусыларҙы ҡотлап телмәр тотто. Төбәктә йәшәүсе милләт вәкилдәренең дуҫлығы, татыулығы һәм берҙәмлеге дөйөм үҫешкә нигеҙ икәнлегенә баҫым яһаны. Артабан, мәҙәни сара матур концерт менән дауам итте. Сәхнәлә билдәле артистар һәм райондарҙан саҡырылған ижади коллективтар сығыш яһаны. Концертты, режиссер, инде республикала үҙенең таланты һәм юғары профессионаллеге менән танылған Рөстәм Хәкимов сәхнәләштергән. Уны М. Ғафури исемендәге БДАД театры актеры Фирғәт Ғарипов һәм М. Кәрим исемендәге Милли йәштәр театры актрисаһы Рушана Бабич алып барҙы. Башҡорт, татар, рус, украин, белорус, үзбәк,ҡаҙаҡ, ҡырғыҙ һәм башҡа бимк күп милләттәрҙең мәҙәниәтен сағылдырған уникаль сығыштарҙы халыҡ концерт аҙағына аяғүрә баҫып алҡышланы. Концерт бер тында үтеп китте. Ә ҡарап ултырыусыларҙың күңеленә һалынған берҙәмлек осҡоно оҙаҡ һүрелмәҫ әле.